Luachanna
Cód Cleachtais do Ghrúpaí Pobail Gaeilge & Gaeltachta

Is treoir atá sa chód cleachtais seo do ghrúpaí pobail Gaeilge agus Gaeltachta chun cuidiú leo iad féin a riar go héifeachtach,
go gairmiúil agus de réir aon oibleagáid dhlíthiúil atá orthu.
Leagtar amach na bunphrionsabail a mholtar mar íoschaighdeáin do ghrúpaí atá ag plé le hobair forbartha pobail le Gaeilge sa Ghaeltacht agus lasmuigh di.

Clúdaíonn an téarma ‘grúpa pobail’ sa cháipéis seo eagraíochtaí deonacha pobail agus comhlachtaí cláraithe neamhbhrabúis araon, a shaothraíonn ar son leas pobail Ghaeilge nó Ghaeltachta. 
D’fhéadfadh go mbeadh nó nach mbeadh baill foirne fostaithe ag an ghrúpa. Tá an cód seo ábhartha do gach saghas grúpa pobail Gaeilge agus Gaeltachta.

Beidh grúpaí atá ag teacht le caighdeán an chóid seo in áit láidir chun freastal ar na riachtanais teanga agus pobail ina gceantair féin,
aidhmeanna agus táscairí a chomhlíonadh, teacht ar mhaoiniú agus comhpháirtíochtaí fiúntacha a fhorbairt.

Conas is féidir aitheantas Luachanna a shaothrú?

Cláraigh

1. Clárú

Cuirigí in iúl dúinn gur mhaith libh aitheantas a bhaint amach tríd an fhoirm chlárúcháin ar shuíomh idirlín Ghlór na nGael. Tá sé saor in aisce páirt a ghlacadh agus is féidir é a dhéanamh am ar bith le linn na bliana. Is gá clárú roimh dheireadh mhí Mheán Fhómhair, áfach, chun aitheantas a fháil don bhliain reatha.

2. Measúnú

Oibríonn an grúpa pobail agus foireann Glór na nGael le chéile chun an caighdeán atá sa chód seo a chomhlíonadh. Nuair atá an grúpa réidh dó, déantar an measúnú foirmeálta. Cuirtear aiseolas cuimsitheach ar fáil mar thoradh ar an phróiseas. Cuidíonn sin le fás, le forbairt agus le feabhsú an ghrúpa. Tugtar deis do ghrúpaí dul faoi mheasúnú foirmeálta amháin, agus, sa chás nach léirítear an caighdeán cuí, athmheasúnú amháin in aon bhliain féilire.

3. Aitheantas

Fógraítear go poiblí liosta grúpaí pobail a bhaineann caighdeán ‘Luachanna’ amach gach bliain. Bronntar aitheantas tríd an scéim seo ar bhonn bliantúil agus cuirfear teastas agus pacáiste aitheantais digiteach ar fáil. Ní fhógraítear ainmneacha na grúpaí nach mbaineann caighdeán ‘Luachanna’ amach.

4. Tacaíocht & Oiliúint

Bíonn foireann Ghlór na nGael ar fáil chun comhairle a chur ar do ghrúpa maidir leis an chaighdeán a chomhlíonadh. Cuirtear cáipéisí tacaíochta, teimpléid agus ceardlanna físe ar fáil chomh maith. Cuireann foireann Ghlór na nGael bunoiliúint ar fáil a chuidíonn le tuiscint a fháil ar na hábhair sa cháipéis seo. Tá muid in ann saineolaithe a mholadh má bhíonn oiliúint níos cuimsithí de dhíth.

Roghnaigh do theanga / Choose your language