AM OIBRE, SOSANNA AGUS BRISTÍ OIBRE

4.4. AM OIBRE, SOSANNA AGUS BRISTÍ OIBRE

CUSPÓIR

Léiríonn an polasaí seo go bhfuil Glór na nGael ag comhlíonadh na bhforálacha san Acht um Eagrú Ama Oibre, 1997, ó dheas agus Na Rialacháin Ama Oibre (TÉ) 1998 ó thuaidh ar forálacha iad a bhaineann le ham oibre, le tréimhsí sosa agus le bristí oibre. Cosnaíonn an polasaí freisin cearta an fhostaí arna leagan amach sa reachtaíocht seo d’fhonn a chinntiú nach sáraítear iad.

RAON

Tá feidhm ag an bpolasaí seo i leith na bhfostaithe uile.

POLASAÍ

Beidh gnáthuaireanta oibre ann de réir théarmaí agus choinníollacha na fostaíochta, Luan go Déardaoin 9.00r.n. – 5.15i.n. agus Dé hAoine 9.00r.n. – 1.00i.n.. Ó am go chéile aithnítear go bhféadfaí a éileamh ar fhostaithe obair a dhéanamh sa bhreis ar na huaireanta sin d’fhonn riachtanais ghnó a chomhlíonadh. Tá an eagraíocht tiomanta, ámh, a chinntiú nach n-oibríonn aon fhostaí níos mó ná an mheánseachtain uasta oibre, a cinneadh san Acht um Eagrú Ama Oibre, 1997 ó dheas agus Na Rialacháin Ama Oibre (TÉ) 1998 ó thuaidh. Tá tú i dteideal leathuair de bhriseadh lóin a bheith agat.  Tá tú i dteideal freisin 2 bhriseadh de 15 nóiméad an ceann a thógáil, ceann ar maidin agus an ceann eile sa tráthnóna. Tá sé ina pholasaí ag an eagraíocht a chinntiú go dtugtar an deis do gach fostaí a n-íosteidlíochtaí sosa laethúla agus seachtainiúla a thógáil de réir an Achta um Eagrú Ama Oibre, 1997 ó dheas agus Na Rialacháin Ama Oibre (TÉ) 1998 ó thuaidh. Ní ceadmhach sosanna a sceidealú do thús ná do dheireadh an lae oibre rud a thabharfadh lá oibre níos giorra don fhostaí.  

NÓS IMEACHTA

I gcás go mbeadh fiosrúchán ag fostaí i ndáil lena n-uaireanta oibre, lena mbristí nó lena dtréimhsí sosa, nó i gcás nach raibh siad ábalta leas a bhaint astu sin, ba chóir é sin a chur i bhfios don Bhainisteoir líne nó don Bhainisteoir Acmhainní Daonna, nó é a tharraingt anuas trí  nós imeachta gearáin na heagraíochta.