Céad Bhabhta 2026 Deontais FSMD anois ar oscailt

Tá lúcháir ar Ghlór na nGael go bhfuil an chéad bhabhta de dheontais Fhondúireacht Sheosaimh Mhic Dhonncha 2026 anois oscailte.

Beidh fuinneog coicíse ó 25ú Feabhra go 12ú Márta ag clubanna atá cláraithe leis an Fhondúireacht le cur isteach ar dheontas suas le €500 le tograí Gaeilge a eagrú i gclubanna CLG. Moltar do chlubanna smaoineamh ar thograí a chuirfidh le h-úsáid rialta agus leanúnach na Gaeilge sa chlub. 

Tabharfar tosaíocht d’imeachtaí rialta teaghlaigh atá á reáchtáil ag clubanna CLG agus do shraith dheiseanna úsáide Gaeilge i gclubthithe CLG agus i measc ballraíochtaí clubanna. Ní bheidh deis sa bhabhta seo iarratas a chur isteach ar mhaoiniú le haghaidh comharthaíochta ach beidh sa darna babhta i mbliana.

Ní mór do chlubanna bheith cláraithe le Fondúireacht Sheosaimh Mhic Dhonncha sa bhliain reatha seo agus an táille €40 bheith díolta acu sular féidir glacadh le hiarratas ar mhaoiniú ón chlub. Tá am ann go fóill do chlubanna le clárú don scéim trí léiriú spéise a chur isteach anseo.

Is scéim tacaíochta de chuid Ghlór na nGael agus de chuid Chumann Lúthchleas Gael í Fondúireacht Sheosaimh Mhic Dhonncha, ar mhaithe le clubanna CLG ar mian leo an Ghaeilge a chur chun cinn. Is féidir tuilleadh eolais faoin scéim a léamh anseo nó bí i deagmháil linn ag clg@glornangael.ie.