Cuireann Glór na nGael fáilte romhat chuig seisiún eolas faoin scéim nua de chuid Foras na Gaeilge ‘Scéim Forbartha Líonraí Gaeilge’. Cuirfidh foireann Ghlór na nGael eolas ar fáil maidir leis an scéim nua, faoin phróiseas iarratais agus ar na tacaíochtaí a chuireann muid féin ar fáil do choistí pobail.
Dáta: 16ú Iúil
Am: 11:00rn
Láthair: Zoom
Cláraigh trí ríomhphost a sheoladh chuig frainc@glornangael.ie
Cuireann Glór na nGael fáilte roimh an scéal seo go bhfuil comharba Scéim Phobal Gaeilge fógartha ag Foras na Gaeilge, mar atá Scéim Forbartha Líonraí Gaeilge. Is cúis faoisimh í do na coistí agus do na hOifigigh Forbartha sin atá ag fanacht i bhfad ar chinnteacht faoin scéim seo. Tabharfaidh fógairt na scéime úire deis do na coistí pobail a bheith ag pleanáil níos faide chun tosaigh, don chéad uair le fada.
Aithníonn Glór na nGael áfach, nach ionann an méid a bheas curtha ar fáil tríd an scéim nua seo agus an t-éileamh a rinne na coistí pobail le linn an phróisis comhairliúcháin anuraidh. Ní bheidh sé de chumas ag gach coiste na costais agus tuarastail reatha a ghlanadh trí ioncam na scéime seo amháin, gan trácht ar sheirbhísí bunúsacha a chur ar fáil dá bpobal, gan bheith ag braith ar scéimeanna iomaíocha maoinithe eile.
“Cé gur chéim chun tosaigh é seo, agus go cuireann muid fáilte chúramach roimh an scéim nua atá fógartha inniu, fágfaidh sé na coistí reatha níos boichte fós ná mar a bhí siad nuair a cuireadh an Scéim Pobal Gaeilge ar bun an chéad lá riamh. Cuireann muid fáilte roimh na leibhéalacha éagsúla atá luaite leis an scéim nua seo. Is fada atá foireann Ghlór na nGael ag cuidiú agus ag tacú le coistí nua, agus coistí neamhfhorbartha, agus creideann muid gur ábhar dóchais é do choistí den chineál seo scéim bhunleibhéal a bheith ar fáil. Is cúis áthais dúinn chomh maith faoi leagan amach nua na scéime nach mbeidh ceantar ina bhfuil Líonra Gaeilge, Baile Seirbhíse Gaeltachta nó cnuasach d’Oifigigh Forbartha SPG faoi aon mhíbhuntáiste.”
Lorcán Mac Gabhann, Ceannasaí Ghlór na nGael
Tá Glór na nGael ag súil le cur i bhfeidhm Scéim Forbartha Líonraí Gaeilge 2022-2024 agus ag súil leis go mbeidh deis ann do Fhoras na Gaeilge tuilleadh infheistíochta a chur ar fáil do choistí na scéme le linn tréimhse na scéime.
Mar chuid den ullmhúchán don scéim aitheantais do ghnónna a úsáideann an Ghaeilge, tá Glór na nGael ag eagrú Comhdháil Fhíorúil.
Aoine 18 Meitheamh @ 12:00
Beidh na cainteoirí thíos ag tabhairt léargas ar dea-chleachtas le Gaeilge sa ghnó ar Zoom.
Na Cainteoirí:
𝗠𝗶𝗰𝗵𝗲𝗹𝗹𝗲 𝗡𝗶𝗰 𝗦𝘂𝗶𝗯𝗵𝗻𝗲 – Bainisteoir, 𝘔𝘦𝘯𝘵𝘰𝘳 𝘎𝘢𝘦𝘪𝘭𝘨𝘦 & Bunaitheoir “𝘘-𝘔𝘩𝘢𝘳𝘤”
𝗖𝗼𝗻𝗼𝗿 𝗠𝗰𝗗𝗮𝗶𝗱 – Bainisteoir Miondíola, 𝘋𝘶𝘯𝘥𝘳𝘶𝘮 𝘛𝘰𝘸𝘯 𝘊𝘦𝘯𝘵𝘳𝘦
𝗦𝗮𝗿𝗮𝗵 𝗝𝗮𝗻𝗲 𝗖𝗼𝗼𝗴𝗮𝗻 – Lithreoir Raidió & Bainisteoir Feachtais Margaíochta, 𝘓𝘐𝘋𝘓 𝘐𝘳𝘦𝘭𝘢𝘯𝘥
𝗡𝗶𝗮𝗹𝗹 𝗢́ 𝗖𝗮𝘁𝗵𝗮́𝗶𝗻 – Coiste Forbartha Charn Tochair & 𝘚𝘪𝘰𝘱𝘢 𝘢𝘯 𝘊𝘢𝘪𝘳𝘯
Is é 𝗙𝗮𝗰𝗵𝘁𝗻𝗮 𝗢́ 𝗗𝗿𝗶𝘀𝗰𝗲𝗼𝗶𝗹, Craoltóir le RTÉ Raidió na Gaeltachta a bheidh ina chathaoirleach ar an gComhdháil.
Fáilte roimh chách!
GRADAIM
Gnó na hÉireann
28 Bealtaine – Seimineár Idirnáisiúnta:
An tábhacht le dátheangachas sa ghnó
Seimineár Fíorúil, 28 Bealtaine @ 12:00: Tá Glór na nGael ag ullmhú scéim aitheantais do ghnónna a úsáideann an Ghaeilge ar a gcuid comharthaíocht, a mbrandáil agus mar chuid dá seirbhísí do chustaiméirí. Seolfar an scéim níos déanaí i mbliana, agus bronnfar gradaim aitheantais ar ghnónna le linn 2022 agus ar bhonn bliantúil i ndiaidh sin.
Mar ullmhúchán don scéim tá cuireadh tugtha do chainteoirí idirnáisiúnta a bhfuil taithí acu ar an dátheangachas sa ghnó labhairt linn ar chomhdháil Zoom ar an 28 Bealtaine.
Beidh Aodhán Mac Cormaic, atá ina stiúrthóir sa Roinn Turasóireachta, Cultúir, Ealaíon, Gaeltachta, Spóirt agus Meán agus freagrach as an Plean 20 Bliain don Ghaeilge 2010 -2030 ar an bpainéal i gcuideachta Oihan Zubizarreta Irebecampos, stiúrthóir cumarsáide leis an gcomharchumann Bascach EMUN; Siubhán Nic Grianna, Bainisteoir Pleanála Teanga Údarás na Gaeltachta; Helene Armentia Artzak atá freagrach as pleananna agus polasaithe teanga in Elhuyar; agus leis an Dr Jeremy Evas, Ceannasaí ar Prosiect 2050 i Rialtas na Breataine Bige.
Is í Niamh de Búrca, Príomhfheidhmeannach Gnó Mhaigh Eo agus comhalta boird Ghlór na nGael a bheidh ina cathaoirleach ar an seimineár.
Tá an chomhdháil seo dírithe go príomha ar ghrúpaí pobail a bhfuil suim acu an scéim aitheantais a chur chun cinn ina gceantair féin, ach is féidir le haon duine freastal air ach clárú roimh ré. (rphost a sheoladh chuig gradaim@glornangael.ie)
Teagmháil: Eoghan Mac Cormaic
Leas-Cheannasaí Glór na nGael
+353 85 71 87678
Cathaoirleach:
Niamh de Búrca
Príomhfheidhmeannach Gnó Mhaigh Eo & Comhalta Boird Ghlór na nGael.
Eolas faoi na cainteoirí:
Aodhán Mac Cormaic
Stiúrthóir: Stráitéis 20 Bliain don Ghaeilge 2010-2030
Is comhalta de bhord bainistíochta na Roinne é an Dr Aodhán Mac Cormaic agus tá sé freagrach ag leibhéal an Stiúrthóra as an Straitéis 20 Bliain don Ghaeilge 2010-2030 a chur i gcrích, as cláir Ghaeltachta agus polasaí Gaeilge, reachtaíocht agus cláir laistigh agus taobh
amuigh de limistéir ainmnithe Gaeltachta. Tá sé freagrach freisin as an nGaeilge ag leibhéal an AE, as Logainmneacha, as an gComhoibriú Thuaidh-Theas lena n-áirítear an Foras Teanga.
Siubhán Nic Grianna
Bainisteoir Pleanála Teanga Údarás na Gaeltachta
Tá Siubhán Nic Grianna fostaithe mar Bhainisteoir Pleanála Teanga ag Údarás na Gaeltachta agus freagrach as na cláir tacaíochtaí teanga atá ag an Údarás a bhainistiú agus a riaradh, an próiseas pleanála teanga ina measc. Sé cuspóir forbartha an Údaráis ná tacú le cur chun cinn na fiontraíochta agus na fostaíochta ar mhaithe le pobal inmharthana Gaeilge a chothú sa Ghaeltacht. Oibríonn an tÚdarás lena chliantchomhlachtaí ar bhunús leanúnach le cinntiú go bhfuil a dtionchar ar an nGaeltacht dearfach ar go leor bealaí – fostaíocht, úsáid na Gaeilge, seirbhísí agus infreastruchtúr pobal. Cuireann an tÚdarás raon
tacaíochtaí ar fáil dá chliant-chomhlachtaí chun tacú leo céimeanna dearfacha i leith na Gaeilge a chur i bhfeidhm sa láthair oibre agus ina ghnó.
An Dr Jeremy Evas
Ceannasaí ar Prosiect 2050 i Rialtas na Breataine Bige
Roimhe seo bhí Jeremy Evas ina Ceannasaí ar cur chun cinn na Breatnaise agus athrú iompraíochta le Rialtas na Breataine Bige agus ina léachtóir ar pholasaí agus pleanáil teanga ag Scoil na Breatnaise, Ollscoil Cardiff. Bhí sé ina Stiúrthóir Straitéise le Coimisiún na Breatnaise agus Stiúrthóir Polasaí agus Pleanáil Corpais le Bord Teanga na Breataine Bige mar a bhí ann tráth.
Tá an-spéis aige in aimsiú agus i ngníomhú beartais a mhéadaíonn úsáid na Breatnaise. Tá maoirseacht déanta aige ar thráchtais dochtúireachta ar uathoibriú aistriúcháin, agus ar síceolaíocht iompraíochta i leith idirghníomhaíocht daoine dátheangacha le ríomhairí agus i leith seirbhísí oideachais trí mheán na Breatnaise. Tá taighde foilsithe aige ar na tosca a imríonn tionchar ar aistriú na Breatnaise ó ghlúin go glúin. Ina ról le Rialtas na Breataine Bige tá sé freagrach as cláir le úsáid neamhfhoirmeálta na Breatnaise i measc páistí scoile a spreagadh, aistriú teanga i dteaghlaigh; teicneolaíocht i mBreatnais, an Bhreatnais san earnáil phríobháideach agus gnéithe den Bhreatnais mar theanga oibre. Nuair nach bhfuil sé ar obair is maith leis bheith ag rothaíocht.
Oihan Zubizarreta Irebecampos
Tá Oihan Zubizarreta Irebecampos freagrach as cumarsáid sa chomharchumann Bascach EMUN. Le blianta anuas tá sé ag dearadh, ag cur i bhfeidhm agus tabhairt comhairle ar phleananna teanga Bascacha i gcomhlachtaí príobháideacha (mar shampla comharchumainn tionsclaíocha ar nós FAGOR agus ULMA) agus i bhforais poiblí (Rialtas Thír an mBascach agus Comhairle Cúige Gipuzkoa). Tá céim sa dlí aige ó EHU-UPV agus bhí sé ina chomhordaitheoir scéimeanna comhoibre teanga le Garabide, ina raibh sé ag comhoibriú ar thograí forbartha sa Cholóim, Yucatán (Meicsiceo) agus in Eacuadór le pobail teanga Kichwa, Embera agus Yucatecan Mayan. Tá tréimhsí caite aige le comharchumainn Bascacha amhail Mondragon, sa ghrúpa FAGOR agus Laboral Kutxa. Lasmuigh dá chuid oibre, is ball é de chomhlachas amharclainne agus is maith leis bheith ag rothaíocht.
Helene Armentia Artzak
Tá Helene freagrach as pleananna agus polasaithe teanga in Elhuyar. Tá céim Bhitheolaíochta aici ó Ollscoil Thír na mBascach EHU agus Máistreacht i gCórais Bith-imoibreoirí aici ó Insititiúíd Eolaíochta agus Teicneolaíochta, Ollscoil Manchain, chomh maith le cúrsa iarchéime i Measúnú Tionchair Teanga (EHU), ach tá sí tar éis mórchuid a saol oibre a chaitheamh ag dearadh agus ag forbairt polasaithe teanga. Bhí sí ag riaradh tograí a chuir an Bhascais chun chinn i gcomhlachtaí príobháideacha agus san earnáil phoiblí, tograí a rinne úsáid na Bascaise a normalú i ranna éagsúla an Rialtais Bascaigh (An Roinn Sláinte, Emakunde, Institiúd na mBan) agus i gcomhairlí cathracha. Tá na blianta de thaithí aici i dtograí rannpháirtíochta daoine, go háirithe sna cinn a iarrannn an Bascais a athbheocháin sna cathracha. Lasmuigh d’obair is maith leí bheith ag fanaíocht.
Léigh an nuachtlitir is déanaí ó Ghlór na nGael anseo: Glór Teaghlaigh 19 Feabhra 2021
(CUIDEACHTA FAOI THEORAINN RÁTHAÍOCHTA GAN SCAIRCHAIPITEAL)
Tá Glór na nGael, Ceanneagraíocht Ghaeilge, ag lorg tairisceana ó chuideachtaí iniúchóireachta agus cuntasaíochta i gcomhair soláthair seirbhísí iniúchóireachta seachtracha agus cuntasaíochta. Beidh ardchumas Gaeilge scríofa agus labhartha riachtanach do chomhlíonadh na seirbhísí seo.
Bhí ioncam 2020 na heagraíochta, a bhfuil foireann de 18 fostaithe ann, cothrom le €1,242,000, agus luach stoc cothrom le €59,000.
I measc na seirbhísí a bheidh de dhíth, tá;
Seirbhís cuntasaíochta
Seirbhís Iniúchóireachta
Is féidir tairiscint a dhéanamh do sheirbhís iniúchóireachta agus ar sheirbhísí cuntasaíochta le chéile, nó ina aonair.
Tá eolas faoi chuideachta Glór na nGael le fáil anseo.
Seol iarratas tairisceana móide praghas chuig eolas@glornangael.ie roimh an 23 Feabhra 2021.
Tá áthas orainn fógairt inniu go bhfuil síneadh ama 14 lá curtha leis an tréimhse d’ealaíontóirí aighneacht a dhéanamh le saothar comórtha ealaíne a chruthú do Ghlór na nGael, atá ag ceiliúradh 60 bliain ar an bhfód i mbliana. Glacfar le haighneachtaí anois go dtí an 7ú Feabhra 2021 agus tá tuilleadh eolais ar fáil ar www.glornangael.ie
Tugann Glór na nGael cuireadh d’ealaíontóirí aighneacht a chur chugainn roimh Dhéardaoin 24 Eanáir 7 Feabhra 2021 le saothar ealaíne a sholáthar do Ghlór na nGael ag comóradh 60 bliain ó bhunú an eagrais.
Saothar neamhspleách, déthoiseach nó tríthoiseach, a suífear lasmuigh d’ardoifig Ghlór na nGael i Ráth Chairn, Co na Mí. Míneoidh an saothar 60 bliain d’obair fhorbartha i measc pobal na Gaeilge ar fud na hÉireann. Ainmneoidh an saothar na buaiteoirí náisiúnta ó 1961 ar aghaidh.
– An coincheap: 60 bliain. Obair fhorbartha pobail. An Ghaeilge
– Buaine: Ní mór go mbeidh an saothar téagar agus buan (ach inbhogtha más gá amach anseo)
– Buiséad: uasmhéid €10,000
– Amlíne:
Spriocdháta d’aighneachtaí: DÚNTA
Spriocdháta roghnaithe: 28 Eanáir
Spriocdháta críochnaithe: 30 Meán Fómhair 2021
Lorcán Mac Gabhann
Ceannasaí
Tá 48 bonn ‘Fondúireacht Sheosaimh Mhic Dhonncha’ á mbronnadh ar chlubanna CLG as a gcuid saothar ar son na Gaeilge an tseachtain seo.
33 bonn cré-umha, 12 bonn airgid mar aon le 3 bhonn óir atá le bronnadh ar chlubanna ó fud fad oileán na hÉireann. I dteachtaireacht ó Sheán Ó hÓráin, Uachtarán Chumann Lúthchleas Gael, rinne sé comhghairdeas leis na clubanna ar fad ar éirigh leo boinn a bhaint amach sa bhliain thar a bheith aisteach seo.
“Tá éacht mhór déanta acu uile an Ghaeilge a chur chun cinn ina gcuid clubanna. Ba mhaith liom comhghairdeas a dhéanamh ach go háirithe leis na trí chlub ar éirigh leo an bonn óir a bhaint amach. Cumann Naomh Anna, Leitir Móir, Cumann Micheál Breathnach, Indreabhán, agus CLG Naomh Éanna, Gleann Ghormlaithe. Tá ról fíorthábhachtach ag an nGaeilge i gCumann Lúthchleas Gael agus molaim go mór a gcuid oibre agus an dea-shampla atá leagtha síos acu.”
Dúirt Frainc Mac Cionnaith, Bainisteoir Forbartha le Glór na nGael gur ghlac 196 club páirt sa cheathrú bliain don scéim seo i 2020, méadú 45% ar 2019. “Is cúis mhór áthais dúinn go bhfuil líon na gclubanna atá páirteach ag dul i méid bliain i ndiaidh bliana agus go bhfuil siad chomh tiomáinte agus díograsach leis an teanga a chothú sa spórt.”
Is in ómós do Sheosamh ‘Joe’ Mac Donncha (1953-2016) a ainmníodh an Fhondúireacht nua seo. Fear le háireamh a bhí i Joe a bhain go leor amach dó féin agus do phobal na tíre seo i gcoitinne le linn a shaol. D’éirigh leis an post is airde a bhaint amach sa Chumann Lúthchleas Gael, thóg sé Corn Mhic Cárthaigh leis siar go Gaillimh mar iománaí agus bhí sé ina phríomhfheidhmeannach agus mar chathaoirleach ar chuid de mhóreagraíochtaí na tíre seo, Foras na Gaeilge ina measc.
Thíos tá liosta na gclub a bhfuil bonn bainte amach acu. Tá tuilleadh eolais maidir le Fondúireacht Sheosaimh Mhic Dhonncha ar fáil ag www.glornangael.ie/clg
Naomh Éanna CLG, Gleann Ghormlaithe Co. Aontroma
Naomh Anna Leitir Móir CLG, Co. na Gaillimhe
Cumann Mícheál Breathnach CLG, Co. na Gaillimhe
An Beart CLG, Co. Dhún na nGall
Cumann Báire Setanta CLG, Co. Átha Cliath
Cumann Caide na Gaeltachta CLG, Baile na nGall Co. Chiarraí
Cloich Cheann Fhaola, CLG, Co. Dhún na nGall
Cill Chomáin CLG, Co. Mhaigh Eo
Cumann Liathróid Láimhe Anach Cuan Co. na Gaillimhe
Naomh Colmcille CLG, Baile an Bhiataigh, an Mhí Co. na Mí
Áit Tí Chathail CLG, Co. an Dúin
Fine Ghallainn, CLG, Co. Átha Cliath
Cárna Caiseal CLG, Co. na Gaillimhe
Daingean Uí Chúis, CLG, An Daingean Co. Chiarraí
Cumann Peil na mBan Maigh Cuilinn Co. na Gaillimhe
Naomh Séamas CLG, Co. Aontroma
Cumann Naomh Pádraig, Droichead Mhaigh Eo Co. an Dúin
Na Dúnaibh CLG, Co. Dhún na nGall
Naomh Muire Íochtar na Rosann CLG, Co. Dhún na nGall
Oileáin Árann CLG, Co. na Gaillimhe
Long Cogaidh CLG, Co. Átha Cliath
Naomh Fionnbarra, Cabrach. Co. Átha Cliath
Gaeil Raghnallach Co. Átha Cliath
Atháin CLG, Lios na Graí Co. Luimnigh
Cúl CLG, Co. Chiarraí
Éire Óg, CLG, Inis Co. an Chláir
Cumann Peil Uí Chomhraí CLG, Co. an Chláir
Lámh Dhearg CLG, Co. Aontroma
Naomh Mochaí CLG, Co. an Dúin
Ard Cloch CLG, Co. Chill Dara
Gort na Móna Co. Aontroma
Cluain Tarbh CLG, Co. Átha Cliath
Oileán na hÉireann Co. Átha Cliath
Gaeil Triúcha CLG, Co. Mhuineacháin
Éire Óg CLG, An Charraig Mhór (Iománaíocht) Co. Thír Eoghain
An Droim Mór CLG, Co. Thír Eoghain
Seamróga CLG, Ros Liath Co. Fhear Manach
Naomh Colmcille CLG, An Charraig Mhór Co. Thír Eoghain
Baile Dic CLG, Co. Chill Chainnigh
Cluain Dá Ghad CLG, Co. an Chláir
Seanchill CLG, Co. Átha Cliath
Na Solláin CLG, Co. Chill Dara
Naomh Éanna Baile Buadáin Co. Átha Cliath
Seamróga Chonachadh, CLG, Co. Chill Chainnigh
Cumann Liathróid Láimhe Mícheál Breathnach Co. na Gaillimhe
Na Mistéalaigh CLG, Caisleán an Bharraigh Co. Mhaigh Eo
Na Fíníní CLG, Co. Chill Chainnigh
Carraig Seac CLG, Co. Chill Chainnigh
Sheol an láithreoir spóirt Gráinne McElwain aip nua inniu a bheas ina áis thábhachtach agus luchmhar ag clubanna atá páirteach i bhFondúireacht Sheosaimh Mhic Dhonncha, nó ag aon duine eile a chuireann spéis sa teanga.
Tá an aip ar an dá ardán, Android agus Apple.
Ina theachtaireacht le linn an tseoladh dúirt Uachtarán Chumann Lúthchleas Gael Seán Ó hÓráin gur áis iontach í an aip seo a chabhróidh leis na clubanna agus lena mbaill ar fud na tíre agus iad ag cur chun cinn na Gaeilge sa chlub. “Tá sé iontach go mbeidh go leor achmhainní, nuachta agus scéalta maidir le himeachtaí an Chumainn le fáil ann” a dúirt sé.
Dúirt Lorcán Mac Gabhann, Ceannasaí Ghlór na nGael, go raibh aip nua na Fondúireachta ann chun gach eolas agus áiseanna den scoth a chur ar fáil do bhaill maidir le cur chun cinn na Gaeilge sna clubanna. “Is í an áis is fearr liomsa san aip seo ná na físeáin a dhéanann cur síos ar an bpleanáil teanga ar an leibhéal is bunúsaigh, agus iad dírithe ach go háirithe ar tús a chur le plean teanga i gcomhthéacs an chlub” a dúirt Mac Gabhann. Ghabh sé buíochas le Roinn na Gaeltacha, Foras na Gaeilge, foireann Pháirc an Chrócaigh, Uachtarán CLG Seán Ó hÓráin agus le foireann Ghlór na nGael, ag rá nach mbeadh an Fhondúireacht chomh láidir is atá gan a dtacaíocht.
D’fháiltigh Cathaoirleach Choiste Náisiúnta na Gaeilge CLG, Seosamh Mac Donncha roimh an aip ar a bhfuil fáil ar eolas ar an Fhondúireacht féin agus ar an fhoireann atá ag obair i ngach réigiún. Beidh an nuacht ar fad ann mar a bhaineann sé leis an Ghaeilge agus leis an spóirt, chomh maith le nuacht thábhachtach maidir le rannpháirteachas do chlub san Fhondúireacht.
Taobh le foclóir cuimsitheach spóirt, tá físeáin Gaeilge ar an traenáil agus scileanna spóirt, gearrscannáin agus ceachtanna teanga. Tá podchraoltaí, áiseanna foghlamtha agus teagaisc, eolas ar an phleanáil teanga agus ar eagraíochtaí agus pobal na Gaeilge.
Tá féilire ann le dátaí tábhachtacha i mbliain na Fondúireachta agus cuirfear brúfhógraí chuig úsáideoirí chun nach ndéanfar dearmad ar spriocdhátaí go deo.
Tá go leor eolais agus áiseanna an-úsáideacha ar an aip anois agus beidh muid ag cur leis i gcónaí le go mbeidh sé ina stór mór, luachmhar ag pobal na Fondúireachta agus ag pobal na Gaeilge.
Eolas faoi Fhondúireacht Sheosaimh Mhic Dhonncha
Is scéim tacaíochta de chuid Ghlór na nGael agus de chuid Chumann Lúthchleas Gael í Fondúireacht Sheosaimh Mhic Dhonncha le haghaidh clubanna CLG ar mian leo an Ghaeilge a chur chun cinn. Tá formhór na gclubanna ag cur na Gaeilge chun cinn bealach amháin nó bealach eile. Is é cuspóir na fondúireachta seo ná na hiarrachtaí sin a fhorbairt ar bhonn tomhaiste agus pleanáilte. Cuirfidh Glór na nGael cuidiú ar fáil don Oifigeach Gaeilge i bhfoirm chomhairle, tacaíochta agus idéanna le tógáil ar an obair mhaith atá á déanamh sa chlub cheana féin. Is féidir deontas a lorg ón Fhondúireacht chun cuidiú leis na pleananna sin a chur i gcrích agus bronnfar bonn ar na clubanna as méid áirithe a bhaint amach ar son na teanga.
Bunaíodh an Fhondúireacht in 2017. Go dáta tá 196 club páirteach inti.
Déanfaidh Siún Ní Dhuinn (Léachtóir, scríbhneoir agus eagarthóir), cathaoirleacht ar shraith cainteanna ar shainábhair faoi leith a bheidh á eagrú ag Glór na nGael le linn Deireadh Fómhair 2020. Tá an phaindéim reatha ag cur brúanna ar bhaill den phobail agus is iarracht iad na cainteanna seo deis a thabhairt do ghrúpaí pobail Gaeilge dul i ngleic leo.
Craolfar na cainteanna beo ar Facebook gach Dé Luain ag 7i.n. i rith mí Deireadh Fómhair 2020.
Seo a leanas eolas faoi na hócáidí, ceann ar cheann;
Meabhairshláinte
5 Deireadh Fómhair 2020, Oíche Luan – 7.00i.n
Cainteoirí: Ríonach de hÓir Campbell (Príomh Teiripeoir i Pieta House) agus Lorcán Fingleton (Siceolaí i Seirbhísí Meabharshláinte)
Ábhar:
Faisean inbhuanaithe,
12 Deireadh Fómhair 2020, Oíche Luan – 7.00i.n
Cainteoir : Caoimhe Ní Chathail – Láithreoir
Ábhar:
Tógáil clainne
19 Deireadh Fómhair 2020, Oíche Luan – 7.00i.n
Cainteoirí : Stella Uí Chatháin – Tuismitheoir & Cáit Verling – Siceolaí Cliniciúil leis an FSS
Ábhar:
Tionscadail fhéideartha athrú aeráide
26 Deireadh Fómhair 2020, Oíche Luan – 7.00i.n
Cainteoir : Rónán Ó Dálaigh Príomhoifigeach Feidhmiúchain Thriftify
Ábhar:
