I mbliana tá suas le céad coiste cláraithe i gComórtas Náisiúnta Ghlór na nGael agus thart ar fiche eile, atá cláraithe leis an gComórtas Domhanda. Clúdaíonn na coistí náisiúnta gach contae sa tír agus tá deich gcinn de thíortha éagsúla bainteach leis an gComórtas Domhanda (cé go bhfuil níos mó na coiste amháin i mbeagnach gach tír atá bainteach leis an gcomórtas).

Oibríonn cuid mhór de na coistí go deonach agus cruthaíonn an chuid eile fostaíocht do Ghaelgóirí na tíre seo. Go dtí seo tá obair iontach déanta ag na coistí uilig, ó bhunú naíscoileanna agus gaelscoileanna go himeachtaí Gaeilge a eagrú sna ceantair ina bhfuil siad.

Eagraíonn na grúpaí gach rud ó ranganna Gaeilge go himeachtaí Gaeilge agus tá siad ag tabhairt an seans do dhaoine éagsúla teacht ar bord agus ár dteanga álainn a úsáid.

Tá sé soiléir ón méid oibre atá déanta ag na coistí go bhfuil fís shoiléir agus ardmheas acu ar fhorbairt na teanga agus ar an teanga féin. Molann Glór na nGael an tsárobair atá déanta acu.