Preas ráiteas
Cumann Gaelach UCD ar an chumann is fearr
Is é an Cumann Gaelach i gColáiste na hOllscoile Bhaile Átha Cliath buaiteoir an chomórtais do na cumainn ghaelacha sna coláistí tríú leibhéal, a d’eagraigh Glór na nGael.
Eagraíódh an comórtas le haitheantas a thabhairt don chumann a rinne an t-éacht is móle timpeallacht an choláiste a ghaelú.
D’fhógair an Dr Máire Ní hAnnracháin, Cathaoirleach Coiste Stiúrtha Ghlór na nGael, an scéal agus í ag caint ag dinnéar speisialta de chuid an Chumainn sa Radisson SAS Hotel, Domhnach Broc.
Ag gabháil comhghairdeas leis an chumann, dúirt Marcas Mac Ruairí, Oifigeach Forbartha le Glór na nGael: “Tá ard moladh ag dul don Chumann Gaelach in UCD a bhfaighaidh duais de €2,000.
“Ag ceiliúradh céad bliain den chumann sa Radisson SAS aréir, bhí bliain rathúil acu nuair a mhéadaigh ballraíocht an chumainn ó 200 anuraidh go dtí breis is 900 i mbliana.
“I measc na rudaí a chuaigh i bhfeidhm ar na moltóirí bhí an obair a dhéanann an coiste le himeachtaí sóisialta a sholáthar agus is cinnte gur ábhar mór spreagtha na himeachtaí seo don bhallraíocht.
“Chomh maith leis sin, tá an obair déanta acu le seirbhísí Gaeilge a spreagadh san ollscoil, togra den tidéal ‘No Béarla’ ina measc, inár bhain siad úsáid as cur chuige clár de chuid TG4 a bhain cáil áirithe amach.
“B’ iad na buaiteoirí eile ná an Cumann Gaelach Coláiste Froebel sa dara áit le €1,500 agus Cuallacht Cholm Cille, Maigh Nuad, agus an Cumann Gaelach Ollscoil Uladh, Cúil Raithin le chéile sa Triú áit, le €500 an cumann.
“Ba mhaith liom an deis seo a ghlacadh le comhghairdeas a ghabháil leis na buaiteoirí uile. Le daoine óga mar seo is féidir linn bheith cinnte go mbeidh an Ghaeilge slan go ceann i bhfad,” arsa an t-uasal Mac Ruairí.
Bronnfar na duaiseanna ag ócáid speisialta in Inis, Contae an Chlár, ar 29 Márta 2008.
Ráth, Baile Cairn, Baile Átha Bhuí, Contae na Mí
Teil: 046 943 0974 R: fiosru@glornangael.ie
